Tractatus II, Caput 2

De kyrieleyson

Post glorificationem trinitatis sequitur inuocatio eiusdem, que fit per fidem, quia quomodo inuocabunt, in quem non crediderunt, ad romanos x circa medium.

Dicitur ergo kyrieleyson, christeleyson, kyrieleyson. In primo et tercio non fit uariatio uocis, quia tantum una est natura patris et spiritus sancti. In medio fit propter duas naturas christi.

Dicitur autem in greco, quia tribus linguis laudamus deum in missa, in greca per kyrieleyson, in hebrayca per alleluia et sabaoth, in latina in aliis. Omnis enim lingua debet confiteri deum, et titulus crucis scriptus fuit, ut habetur iohanne xix circa medium: hebrayce, grece, et latine.

Nonies autem inuocat ecclesia trinitatem, | ut per istam inuocationem perueniat ad laudem et societatem nouem ordinum angelorum.

fol. 134ra

De gloria in excelsis deo

Vnde statim inmiscet se cantico angelico, et incipit sacerdos gloria in excelsis deo, quod habetur luce ii circa principium. Et in hoc representat angelum, qui apparuit pastoribus. Et chorus respondet cantico angelorum, qui canticum istud cantauerunt nato domino, luce ii circa principium, per cuius natiuitate fuit gloria in excelsis, id est in angelis de reperatione sua. Pax autem fuit in terra, id est reconsiliatio hominis ad deum, hominis ad angelum, hominis ad hominem. Quod uero sequitur: Laudamus te et cetera, non fuit dictum ab angelis, sed appositum fuit a beato hylario, ut dicitur generaliter. Tamen papa innocentius dicit, quod a quodam papa fuit additum, qui fuit nonus a beato petro et instituit cantari in missa. Sed a quocumque fuerit additum, optime factum est. Bonum enim est laudare ipsum, id est predicare eius bonitatem, et benedicere ipsum, id est bona dicere de ipso, et adorare ipsum, id est profiteri eius maiestatem, et glorificare ipsum, id est dicere, quod eius solius est gloria, uel enarrare gloriam siue delicias eius; et bonum est gratias agere ei. Que omnia fiunt per ea, que sequntur, sicut perceptum est: Cantate domino canticum nouum, scilicet psalmus xcu, de natiuitate eius et aliis eius, que pertinent ad nouitatem hominis: Cantate domini et benedicite nomini eius.